貳零壹柒,一定唔得

政改五部曲來到白熱化階段,宣傳口號都又「有商有量」過渡成「一定要得」,呢個口號認真巴閉,充分顯現其宣傳團隊的真誠,本住一顆赤子之心,將香港政府果種專制蠻橫,我話得就要得,目中無人既精神赤裸裸地比市民睇清楚。之前懶係平等對話諮詢,而家索性擺出一副高高在上既命令姿態,做戲都費事。難怪民調支持「袋住先」既比率急降,有賴落區對話之外,「一定要得」呢個口號認真有效,最難得就係佢既本土連結,兩代人聯想到兩首口語廣東歌,夠晒地道,兩首歌仲要有同一個核心訊息,創作之用心良苦可見一斑。

maria-chicken

我一切決定都似係冇乜意義

「一定要得」呢四個字,最快令大家諗起既廣東歌當然就係肥媽既《要爭取快樂》啦,段歌詞既重點當然在於果句「得既得既得既得既一定得」,但亦應該冇咩樂迷會唔記得接續果句,就係「嘥氣」。班高官落區話「一定要得」,市民齊齊回應「嘥氣」,真係夠晒應景。而《要爭取快樂》首歌原來既出處竟然係 1987年既《龍虎風雲》,英文片名 City on Fire,只係個名已經同今日香港緊扣,但睇埋故事更覺喻意深遠,關於警察既身份認同問題,到底根據上司指令執法係咪就等於遵從良心公義,睇過部戲既人就會明白戲中既掙扎反思,比起而家政府一味灌輸差人維持治安秩序就咩都得既價值觀,《龍虎風雲》無疑係向佢地撥左一盆冷水。

睇怕親建制既肥媽以後登台都係少唱呢首歌為妙,始終唔太好意頭,令人有太多政改聯想就唔多好。今時今日既肥媽唔會想同政府/建制講「嘥氣」,而比較鍾意同電視機前面既家庭觀眾講「慳D」。呀,唔係,係食平D 先啱; 噢,唔好意思,原來已經拍到第三輯,而家個名叫《食平3D》,真係失覺晒。CCTVB 而家節目改名,同政改宣傳口號一樣咁有創意,煮野食都有3D? 不過明明冇3D卻叫自己做3D,同政改冇真普選叫自己做普選都一樣,但難道唔係違反左商品說明條例? 我反而期待下一輯肥媽節目會叫咩名,《食平4D》好定《食平3DD》好呢?

以下《要爭取快樂》現場版本,取自去年紅館演唱會,咁啱就係831演唱,人大落閘當日。

我最想吃雞 我最終變臘鴨

mcdull-chicken

唔知係政府配合潮流,定係政府同創意業界心靈相通,港產片年頭先有兩部以鴨為主題既戲 – 《鴨王》、《12金鴨》,政府又跟住出個咁既口號,「一定要得」,同 duck 諧音,最相關既香港創作,一定係《麥兜故事》主題曲《麥兜與雞》。

新一代未必識《龍虎風雲》,但一定聽過或睇過《麥兜故事》。如果《要爭取快樂》反映緊政府心聲,明明做人樣樣失敗都要死推爛推;《麥兜與雞》擺明就係企係小市民果邊。有趣就係《麥兜與雞》主題同《要爭取快樂》相通,就係故事主人翁都係失敗者,想達到既都做唔到,「一定要得」係《要爭取快樂》只不過係個人強求,係《麥兜與雞》就係社會強加既觀念。而麥兜麥太最近又幫緊百佳賣廣告,同肥媽節目一樣叫人「慳D」呢。

「但現實就似一隻鴨,下下一定要duck(得)」簡直係最準確既預言,香港人硬食「袋住先」,明知假野要當真,明明想食雞,偏偏只有鴨比你。理想就係雞,現實就係鴨,政府取態就係叫泛民同大眾接受政治現實,堅持食雞 (真普選) 並無出路。「唔duck(得),唔duck(得),點算呀? 點樣令隻雞變做鴨?」雞變做鴨,其實就係指鹿為馬既變奏。本來《麥兜故事》除左用duck同得食字互通外,亦暗諷香港教育既填鴨式制度; 而中央政府當然樂見香港人化身「北京填鴨」,咩都聽教聽話啦。查實麥兜同麥太真係好合適做政改宣傳代表,作為「港豬」,比喻具體鮮明,簡直對準目標宣傳對象啦。

《麥兜與雞》

延伸分享:
麥兜三部曲 – 過去 現在 將來

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s